Johan Veenstra
Stellingwarver schriever en verteller

Liwwadden

Plaetst op 16 november 2023.

Et is nogal drok de laeste tied en dan moet et dagboekstokkien wel es in zeuven haosten. En dan maek ik fouten. De karke van Oostrum mos de karke van Oostum wezen en gister ha’k et over puree van wilde kestanjes en dat mos puree van makke kestanjes wezen… Daor wodde ‘k vandaege deur een dagboeklezeresse op attendeerd! Ik bin een grote doezerd. Mar goed, vandaege was et al weer drok. Ik hebbe vandemorgen nog wat verhaelen rippeteerd en bin doe vandemiddag in de auto stapt en naor Liwwadden reden. Ik hebbe de auto bi’j Sieger en Geertje daelezet. Sieger het Geertje en mi’j vervolgens naor et Zuudvliet brocht. Dat was niet veer van heur huus. Geertje het mit me mit west naor een optreden veur de leden van de Vri’je Evangelische Gemiente. Et was een aldergenoeglikste middag en et vertellen gong prima. We begonnen de middag mit et zingen van twie lieden uut de zangbundel van Jehannes de Heer. Et overbekende lied 33: Daar ruist langs de wolken en lied 287: Vreugde, vreugde, louter vreugde… De lieden wodden uut volle bost mitzongen en dat klonk hiel mooi. Et was al mit al een mooie middag in Liwwadden. Nao ofloop bin Geertje en ik kuierende weeromme naor heur huus gaon en ik hebbe vanaovend bi’j heur heerlik waarm eten had. Ik kreeg ok nog een kedogien mit naor huus toe: de roman De onbekende vrouw van Fran├žoise Bourdin. Mooi!