Lidkaktussen

Vandemorgen het Anja bi’j me op vesite west. Ze komt ien keer in et jaor en we hebben weer bepraot wawwe bepraoten mossen. En vandemiddag he’k van Hofstra Wit Goed uut Wolvege een ni’je vriezer kregen. De oolde ha’k ontdujd klaorstaon. Ik hebbe de troep d’r onder vanzels ok opredded. Wat een smeerboel wodt et as zoe’n ding tieden niet van et plak komt! D’r zat ok een mummificeerde moes onder. D’r is mar iene in dit huus die verantwoordelik is veur de dood van dat diertien en dat bin ik niet. Alles wa’k de laeste peer jaor kocht hebbe, hoef ik niet nog een keer te kopen. Dat brengt de leeftied mit. Et was mien laeste auto, fiets, komputer, laptop, printer, cv-ketel en vriezer. De lidkaktussen bluuien prachtig op et ogenblik. De iene is zo groot dat hi’j allienig in et trappegat goed tot zien recht komt. Hieronder d’r een foto van.