Lezing Niek van der Oord

Omda’k al weken verkrampt bin deur zere spieren en gewrichten he’k vandemiddag een gesprek mit de dokter had. De fysio van Marian is niet genoeg. D’r zal meer gebeuren moeten. Now ja, dat moet dan mar.

Even weeromme naor gister. Naoda’k gistermiddag in et gemientehuus was veur de onthulling van et beeld Big Pretty Lady van Guus Hellegers (1937-2019), wa’k gisteraovend alweer in et gemientehuus. Et is 80 jaor leden dawwe bevri’jd binnen van de Duutse terreur. Daoromme is d’r overal een protte te doen. Niek van der Oord hul gisteraovend een lezing in de raodszael over de jodevervolging en de joodse kampen in de Stellingwarven (Else, De Fochtel en Blesdieke) en naoste omgeving. Et was van begin tot aende slim boeiend. De raodszael zat vol volk. Nao et schoft vertelde Niek over et joodse kamp It Petgat in Blesdieke. We konnen zien hoe overwoekerd as et indertied was en hoe et staorigan opknapt is. Ieder jaor is daor op 2 oktober een herdaenking. De JVS het een vlaggemast en een vlagge an de stichting schonken die et kamp beheert. Niek van der Oord het verschillende boeken schreven. Et bekendste is et boek Jodenkampen.