Lezen boeken

Ik bin vandemorgen eerst weer begonnen om de oprit sni’jvri’j te maeken. Dat was gauw gebeurd. D’r was hier vannaacht mar hiel weinig valen. En vandaege tot now an toe ok praktisch niks. De wiend vaalt ok slimme mit. Et wodt allemaole ok wel es wat overdreven. We hadden vroeger wiethoevaeke van dit soort winters. Ik hebbe et werachtig wel slimmer mitmaekt. Doe wodde d’r niet zoe’n drokte omme maekt. Ik zal d’r nog een kollum over schrieven. In de gerage he’k een wollen deken over de agave legd, omdat et van zaoterdag op zundag tien graoden vriezen kan. Ik hebbe de hoolten regentonne ok leeg schept. Dan kommen d’r gien basten in. En ik hebbe de kollum die ‘k gister in klad schreven hebbe hielemaole uutwarkt, uuttikt en bi’jfiekt. Butendat he’k verhaelen rippeteerd.

Ik perbere ieder jaor 50 boeken te lezen. Dat is vanzels te min, mar ja… Et iene jaor lokt et, et aandere jaor krek niet. Over de laeste vuuf jaor komme ik d’r gemiddeld krek an toe. Hier et overzicht van de laeste vuuf jaor. 2021: 41 boeken, 2022: 49 boeken, 2023: 59 boeken, 2024: 48 boeken en 2025: 55 boeken. Ik zal van ’t jaor mien best weer doen. Een meens kan nooit genoeg lezen. Et scharpt de geest en bevoddert de fantesie.