Lepelaars en pelikanen

D’r kwammen gister berichten vanuut Duutslaand en vanof Texel dat de lepelaars op ‘e foto bi’j mien dagboekstokkien gien lepelaars binnen mar pelikanen. Dat is ongetwiefeld waor. Behalven de pelikanen die zatten te soezen, leupen d’r ok verschillenden rond. Iene mi’jde as et waore mit zien grote snaevel as een zende over et grus henne en kreeg et op die meniere in de bek. Is dat gewoon gedrag van pelikanen? Ik kan me veurstellen dat voegels in et waeter mit de snaevel over de bojem strieken en zo alderhaande lekkers bi’j mekeer gadderen. Mar om zo deur et grus te strieken… Of zol et een pelikaan west hebben die wat in ’t wilde was? D’r bin ok zat meensken wat in ’t wilde, dat misschien komt zoks bi’j pelikanen ok wel veur. Ik bin dus gien deskundige. Ik hadde op et ulo examen een vufe veur biologie/fysica. Mien ienigste onvoldoende. Mar dat kwam veural deur fysica. De Maegdenburger halve bollen hebben me nog nooit ok mar iene klap interesseerd.

Naoda’k vandemorgen verhaelen rippeteerd hadde, he’k een heerlike fietstocht van 45 kilemeter maekt. Et fietspad van Kontermaans naor Wolvege is nog altied ofsleuten. Ik bin dus eerst naor Wolvege fietst en doe naor et Lendepattien. Ik bin over de Drieweg- en Scheenesluus fietst en doe over Ooldelaemer en Ni’jhooltwoolde naor sjefeursresteraant De Stoof an de oolde rieksweg in Wolvege. Daor he’k wat drinken en een tosti had en doe bin ‘k weer naor huus fietst. Onderwegens he’k twie foto’s maekt. Boven: dit is et mooie broggien vlakbi’j de Driewegsluus. Onder: dit is vlakbi’j de Scheenesluus naost de Helomavaort. Nog even en alles wodt weer gruun en dan bluuien de dotterbloemen hier weer.