Lendepattien

Vandemorgen om kwat over achte bin ‘k al op ‘e fiets stapt en over De Hoeve naor Kontermaans gaon. En  doe… et ni’je Lendepattien langes naor Wolvege. Wat is et mooi wodden! Prachtig! Wat heerlik om daor weer langes fietsen te kunnen. Et pattien en de Lende hebben beidend wat extra kronkels kregen. D’r liggen twie mooie broggies in et pattien. Naoda’k twie fietstassen vol bosschoppen ophaeld hadde uut de supermark bin ‘k nog een keer over dat mooie Lendepattien fietst! Veur elven bin ‘k thuus al weer op ‘e fiets stapt. Ik bin bi’j de Kuunder langes naor Berkoop gaon en wel naor de snackbar bi’j de Koepelbos. Daor he’k een brotien kroket behaffeld. Et waarme eten schöt d’r vandaege weer bi’j in. Vandemiddag he’k weer boeken verkocht. Et was krek as gister drok op ‘e Eupen Stal. Ik bin now krek over De Hoeve weer naor huus fietst. Al mit al he’k vandaege ok nog 53 kilemeter fietst. Van verscheiden meensken kree’k vandemiddag slim positieve reakties op mien kollum die vandaege in de Liwwadder Kraante ston. D’r kwam ok een mail van Jan van De Jouwer die me mailde dat de boeren weer boerken gaon moeten zoas zien omken Jan Eits en Knelis de Vries dat vroeger in Ni’jhooltpae deden! Hieronder een foto die ‘k vandemorgen vanof et Lendepattien maekt hebbe. Disse koenen leupen an de Hooltpaeïnger kaant van de Lende.