Lendepattien

Et was vandaege prachtig weer, de temperetuur leup op naor krap twintig graoden, dat ik hebbe mit mekeer veertig kilemeter fietst. Vandemorgen he’k op ‘e fiets naor fysiosport in Wolvege west en daornao he’k een bakkien drinken had bi’j Jarmo. Die het een powerbank veur me besteld. Een hiele goeien iene daor aj’ wel drie of vier dingen toegeliekertied an oplaeden kunnen. Die kan ‘k dus mooi mitnemen a’k weer naor et hotel in Goes gao. Et is in ieder geval goed om zoe’n ding te hebben omdat de stroom zeker een keer uutvalen zal deur sabotage of zo. In Wolvege zag ik allegeer oranje kiender die bi’j et beeld van Pieter Stoevezaand doende weren. De Keuningsspeulen weren vandaege. Wat troffen ze et mit et weer!

Vandemiddag bin ‘k nog een keer op ‘e fiets naor Wolvege west. Et Lendepattien van Kontermaans naor Wolvege is weer los. Wat is et mooi wodden! Ni’je nogal hoge broggies en overal hebben ze oolde kronkels van de Lende weer uutgreuven zodat die now weer zichtber binnen. Hiel arg mooi! Overal stonnen de hoeken laand daore vol bluuiende pinksterbloemen. Zo mooi! Zo heurt et in wezen vanzels overal te wezen. Al die grune biljatlaekens bin op ‘e duur de dood in de pot. We bin te veer van de netuur ofdwaeld en awwe daor niet drastisch wat an doen, zal de rekening oons prissenteerd wodden. Daor kuwwe staot op maeken. Mit twie fietstassen vol bosschoppen bin ‘k laeter weer op huus an gaon.