Lekkere fietstocht

We hebben vandaege een lekkere fietstocht van 43 kilemeter maekt. D’r was jammer genoeg gien zunne, mar ok gien wiend, en wel 20 graoden. Dat et was heerlik fietsweer. Mit de fietsen aachterop ‘e auto biwwe naor de Driewegsluus reden en daor biwwe begonnen te fietsen. Over de Lendediek, veur et oolde huus van Jelle langes, naor Ossenziel. En doe dat prachtige fietspad mit al die broggies langes naor Kaelenbarg. Dat rieden we elk jaor wel een peer keer, want et is daor zo mooi. Mar… in Kaelenbarg begon et wat te regenen. We hebben een schoffien onder een grote kestanjeboom staon te schoelen. We weren eins van doel en gao over Nederlaand en Wetering, Mar dat dusten we doe vanwege de veurspelde regen niet echt an. We bin doe mar via een aandere route weer naor Ossenziel fietst. Onderwegens hewwe in kefé De Weerribben waarme poeiermelk had en ik hebbe d’r een stokkien Blokzielder Brokke bi’j had. Et spatterde soms wel wat, mar we hebben nooit een regenpak an hoefd te hebben. Van Ooldemark biwwe naor de Sas fietst en doe bi’j et Wiede van de Lende langes naor de Driewegsluus. Vervolgens hebben we nog een rontien de Scheene fietst. En doe hewwe nao 43 kilemeter de fietsen weer op ‘e auto zet. We zaggen daor vier knienen op een tippe grös zitten te eten en te huppelen, wat was dat een mooi gezicht. We hebben vanaovend lekker waarm eten had in resteraant ’t Koepelbos in Berkoop. Hieronder een foto die ‘k vandemiddag maekt hebbe in Kaelenbarg, vlak veurdat et daor begon te regenen.