Laompien

Tiedens de paosdaegen he’k de laeste korrekties daon van et deur mi’j vertaelde kienderboek Et laompien dat een varken is. Ik hebbe de boel vandemorgen weerommebrocht naor de Stellingwarver Schrieversronte in Berkoop. Ik hebbe nog iene kleinighied vunnen en now mar hopen da’k niks zitten laoten hebbe. Et zicht d’r trouwens prachtig uut. Zie hieronder! De drokker hadde al een proefboek maekt. De oorspronkelike tekst van Pim Lammers (1993) is hiel mooi. Ik hope da’k et naor zien idee goed vertaeld hebbe. De tekenings van Milja Praagman (1971) bin ok hiel mooi. Pim en Milja bin een suksesduo van al meerdere boeken. Veur dit boek kreeg Pim Lammers, die oorspronkelik van Oosterwoolde komt, in 2018 een Zulveren Griffel. Et was et eerste Nederlaanse transgender-prenteboek. Hiel mooi dat zoks d’r now ok in et Stellingwarfs is. We moe’n hier vanzels wel een betien mit de tied mit zien te kommen! Et boek komt uut op 1 juni. D’r bin op die dag prissentaosies op schoelen in Oosterwoolde en Noordwoolde. Aovens teveuren, op 31 meie dus, is d’r in Oosterwoolde een aovend mit Pim Lammers en mi’j. Iederiene kan daor henne. A’k daor meer van wete, kriegen jim dat hier wel van me te heuren. Et boek gaot 14,95 euro kosten. Et kan uutkommen deur financiële hulpe van de perveensie Frieslaand en de Johan Veenstra Stichting. Et is geschikt veur kiender vanof drie jaor. Prachtig dus om deur oolden, grootoolden en lichtkaans overgrootoolden veurlezen te wodden. Now ja, iederiene kan et veurlezen! Et boek is aanst overal te koop. Et kan trouwens ok bi’j mi’j besteld wodden. Ik brenge et, krek zoa’k dat mit mien eigen boeken doe, vergees rond in de Stellingwarven! De oplaoge is, a’k et goed hebbe, driehonderd exemplaoren. Wie et alvast bestellen wil… Stuur me mar een berichien!