Johan Veenstra
Stellingwarver schriever en verteller
Plaetst op 14 jannewaori 2023.
Gistermiddag he’k eerst naor uutgeveri’je Bornmeer op ‘e Gediek west om 40 exemplaoren van Pake en beppe Pluus, et Stellingwarver Nijntje-boekien op te haelen. Van mi’j gaot et naor de Schrieversronte en daor zorgen ze d’r veur dat ze bi’j de gemiente Oost-Stellingwarf terechtekommen. Van De Gediek bin ‘k vervolgens naor ex-kollega Piet in Langzwaogen reden. We hadden mekeer in 32 jaor niet zien. Op 18 december 1990 he’k de auto bi’j heur op ‘e oprit daelezet, bi’j zien moeder een bakkien drinken had, en doe moch ik tegenover heur huus in et gebouwgien bi’j de karke vertellen veur de Plattelaansvrouwluden. En now wa’k d’r nao al die jaoren dus weer. Laeter kwammen Jannie en zeune Harry ok thuus, dat daor bin ‘k ok mit in de kunde kommen. Ik hebbe Piet zien enorme verzaemeling Friese boeken bekeken. Hi’j vertelde me dat hi’j d’r 97 percent van lezen het. Ik kreeg ok nog vier dubbelen van him mit. Nao 32 jaor… Bliksem nog an toe, dat is een lange tied. Waor bin zien donkere krullen bleven? En waor bin mien donkerblonde krullen bleven? Alles is verkleurd in de tied. Mar… we hebben genoeglik bi’jpraot.