Langste dag

We hebben de langste dag al weer te pakken en dat geft elk jaor weer een betien een vervelend gevuulte. Ik hole zo van lange, lochtige daegen. Dat et tot nao half elf nog lochtig is. En now brokkelt dat elke dag weer een stokkien of. Et geft me ok een wat weemoedig gevuulte. Elk jaor weer…

Vandemorgen he’k naor et ziekenhuus in Et Vene west om bloed prikken te laoten. Et is de eerste stap veur een daarmonderzuuk. Ankem weke he’k een gesprek mit de internist en dan zal d’r wel een daotum prikt wodden. Mar ik gao eerst lekker nog een midweke mit Jelle naor Lochem. Dat vervelende onderzuuk moet daornao dan mar. Ik hebbe et al zo vaeke had en et is lange niet meer zo belastend as veur jaoren, mar et is ok gien groot genoegen. Mar ja, et moet wel…

Gister biwwe mit de boot bi’j De Veenhoop langesveerd en morgen za’k d’r in de auto naor toe. Daor wodt dan naemelik de Rink van der Veldepries uutreikt an de Bildtse schriever Gerard Marcel de Jong, mien kollega kollumnist in de Liwwadder Kraante. Ik hebbe een uutneudiging kregen om d’r morgenmiddag bi’j te wezen en gao d’r graeg henne.