Lange-ofstaans-loper

Vandemorgen ston d’r inienend een man veur de deure in een shirtien mit Friese pompeblaeden d’r op. Ik docht drekt an mien kollum van gister in de kraante en vermoedde dat et een lelk FNP-lid was. Mar dat was niet zo. Ik hadde et even niet in de gaten, mar et was Sytze uut Sneek, de zeune van Meta uut Ielst. Meta kreeg tegere mit Saakje en Sjoerd op 30 september 1995 tiedens et Stellingwarver Boekebal in Daans Domein Drenth een eerste exemplaor van mien dadde boekien mit Stellingwarver Stiekelstokkies. Zolange ken ik Sytze zien mem al… Sytze maekt (grote) kuiertochten, overal in et laand. Van ’t jaor het hi’j al 1.700 kilemeter lopen, de Nijmeegse Vierdaegse veur de negende keer. Hi’j hadde al es een peer keer eerder lopende bi’j me an de deure west, mar ik was nooit thuus. Vandemorgen was hi’j om zes ure al uut Sneek gaon en om zeuven ure begonnen te lopen in Noordwoolde. D’r ston een tochien van 36 kilemeter op et pergramme. Nao 12 kilemeter kwam hi’j bi’j mi’j an om even een praotien te maeken. Ik heurde dat Meta mit twie aandere vrouwluden op vekaansie in Ermelo is. Et was een gezellige praoteri’je, mar die duurde langer as we eerst dochten. Et begon te regenen, dat Sytze het hier meer as twie uren west. Hi’j het et wel goed bi’j me had. Hi’j het drie koppies koffie, twie sunderklaosmannegies, twie plakkies bolle en een glassien rooie port van me had. En doe was et dreuge en is hi’j de diek weer uutstapt. Hi’j zal ok es mit Meta bi’j me op vesite kommen, mar dan mit de auto.

Op mien kollum van gister in de kraante FNP en opportunisme bin meerdere reakties kommen. Twie veurbeelden: een journalist van Omroep Frieslaand mailde me twie woorden toe. Spiker. Kop. In mar twie woorden kuj’ een protte zeggen. Ik kreeg een langere mail van een man van boven Liwwadden. Die schreef me dat hi’j al lange jaoren lid van de FNP is. Twie kleine zinnegies uut zien mail: As riedslid wie Soepboer gjin topper, as wethâlder wie hy in ramp, en ek as keamerlid hat hy noch gjin punten skoard. En dan ok nog: En dan deputearre Knol. Hy is in feite de tredde BBB-deputearre, mar dat hat hy zels net troch. En dat mailt een lid van de FNP…