Lammert Koster

Vandemiddag om twaelf ure wa’k in et gemientehuus in Wolvege veur overleg mit de burgemeester en de kultuurambtener. Ik hebbe de definitieve versie van de foto bekeken die indertied van me maekt is. Die komt in et gemientehuus te hangen omda’k ereburger van de gemiente bin. De  foto op hiel groot fermaot zicht d’r prachtig uut. De onthulling van de foto, die bi’j de schilderi’jen van de aandere ereburgers komt te hangen, zal wezen op vri’jdagmiddag 15 december om 4 ure. Uutneudigings wo’n deur de gemiente verstuurd. Ik hebbe in et gemientehuus ok een peer bolties had en een glassien drinken en kreeg ok nog een boltien mit veur onderweg naor Ielst in de auto. Ik zag wethoolder Mariska Rikkers ok nog. Heur he’k fielseteerd. Ze verruilt Wolvege veur Den Haag. Ze staot as tiende op ‘e kandidaotelieste van BBB. Ik hebbe heur alvast veurbereided op et feit dat daor een kollum van me over in de kraante kommen zal.

Nao et overleg in et gemientehuus bin ‘k naor Ielst reden veur de ofscheidsdienst van Lammert Koster in de Mauritiuskarke an de Eegrachte. Lammert is 78 jaor wodden. Ik kenne Lammert en zien vrouw Meta al hiel wat jaoren. In de tied dat ik wekeliks op ‘e radio te heuren was mit mien stiekelstokkies, nam Meta op een gegeven ogenblik kontakt mit me op. Dat kontakt is altied in staand bleven. Et laeste boek mit Stellingwarver Stiekelstokkies gaf ik tiedens et Stellingwarver Boekebal op 30 september 1995 an drie fans en daor was Meta d’r iene van. Et was vandemiddag een mooie en ontroerende gebeurtenis. Lammert hul arg van de lieden van Jehannes de Heer, dat die wodden dan ok zongen. Ik hebbe volop mitzongen, want ik vien et ok mooie lieden. Vaste rots van mijn behoud, als de zonde mij benauwt, laat mij steunen op uw trouw... Et wonderlike is dat ik disse zinnen bruukt hebbe in et verhael Postzegels in mien laeste verhaelebundel Naozoemerlaand. De lieden wodden geweldig mitzongen en daor kreeg ik zuver de rillings van over de rogge. En dat veur iene die niet karkelik is. Mar toch, ik vien dat arg mooi om te heuren. Op film konnen we kieken en luusteren naor Syb van der Ploeg en De Kast mit Fierder sûnder dy en twie lieden van et prachtig zingende Urker Mannekoor Halleluja: Lichtstad met uw paarlen poorten en Amazing Grace. Zeune Sytze las een deur himzels maekt gedicht veur zien heit veur. Domenee Dussie Hofstra hul een hiele mooie overdaenking. Dat doen een protte domenees heur niet zo mooi nao. Nao een peer bakkies thee en een koeke he’k ofscheid neumen van de femilie en bin ‘k weer op huus an gaon.