Laf weer

Op 20 augustus 1983 schreef Hans Warren in zien Geheim Dagboek et volgende: Heel laf weer, tegen de avond 33 graden. Ik kan 43 jaor laeter, op 29 juli 2026, woordelik etzelde schrieven. Et woord laf komt ok in et Stellingwarfs veur. Veurdat et vandaege smoorhiete wodde he’k vandemorgen es keken as d’r hier bi’j de Scheene en naost mien oolde huus ok brummels zatten. Niks weerd. Allemaole van dat kleine rooie spul. Dat wodt dus niks. Jammer! Ik hebbe in de hitte ok nog wat uutbluuide bloemen uut de vlinderpollen knipt. Aj’ dat doen kommen d’r de hieltied ni’je bloemen in en bluuien ze tot in de haast. Ik hebbe de potten mit bloemen waeter geven en zal de bloemen op et karkhof aanst ok nog wat geven. Veerder he’k in huus zeten te lezen.

Een schoffien leden wodde in Harlingen de verhaelebundel Yeeha! prissenteerd. Een bundel mit 28 verhaelen van lieke vule schrievers in et Aasters, Bildts, Franekers, Fries, Snekers en Stellingwarfs. Van mi’j staot et verhael Karnemelkziepe in de bundel. Ik hebbe alles now lezen en hebbe d’r van geneuten. In de diverse taelen wo’n d’r blinders mooie verhaelen schreven! In zien inleiding is Abe de Vries ok best tevreden over de kwaliteit in de bundel. Ik moet mar es wat meer lezen van Sipke de Schiffart. Zien roman Sjappy bi’jgelieks.