Laete thuus

Ik was vannaacht eerst tegen half iene thuus, dat betekent da’k gister een blinders mooie aovend in Burgum beleefd hebbe. Ik hebbe eerst genoeglik een peer bakkies thee had bi’j Janny en vervolgens he’k mit Douwe eten in De Pleats. Heerlik! Ze kun je daor een lekker bod waarm eten toemaeken. En doe moch ik optreden veur veertig meensken in een klein zaeltien waor de opstelling prima was. Ik kon dichte bi’j et volk staon te vertellen. Et was slimme aorig dat d’r tal van bekenden kommen weren. Hiel mooi dat Jan en Klasien d’r weren en Wopke en Alie. En dan vanzels ok Jacob uut Makkinge. D’r was ok een vrouw die oorspronkelik van Hooltpae kwam en een man die van Hooltwoolde ofkomstig was. Et vertellen gong prima. Et pebliek was enthousiast en as dat spontaon reageert, begin ik nog beter te vertellen. Zo warkt dat. Et was d’r wel waarm in die kleine ruumte vol meensken, dat ik raekte mien stemme hiel even kwiet. Dat heb ik in die omstaandigheden wel vaeker. Mar et was gauw weer goed. Ik et schoft kwam d’r een vrouw bi’j me die me vertelde dat ze al mien boeken hadde en dat ze me de beste schriever van Nederlaand vun. Eerlik waor!  Ik hebbe et mar even wat ofremd en zegd dat Adriaan van Dis dat grif niet mit heur iens was. Nao ofloop he’k mit et bestuur van de Kulturele Kemmissie nog wat dronken en d’r kwammen bitterballen  op ‘e taofel. En dan wodt et zomar laete. Et was al half twaelf west doe ‘k daor weer in de auto stapte. Mar wat was et een mooie aovend!