Laand onder waeter

Et was vandaege prachtig fietsweer, de temperetuur leup in de loop van de middag op naor 26 graoden. Ik bin bi’j de Lende langes naor de Driewegsluus fietst en doe naor Ooldemark. Daor he’k op et terras van Family een twaelfuurtien mit tomatesop had. Vanof et west van Blesdieke bin ‘k weer naor de Sas reden en doe naor Wolvege om wat bosschoppies te doen. We zaggen et vandeweke al vanof de boot en now vanof de fiets: her en der pompen boeren waeter uut sloden en vaorten en daor zetten ze heur laand mit onder waeter om de moezen te verjaegen. Op zokke plakken staon kloften stormvoegels en sturken klaor veur een lekker happien. De wereld zit gruwelik in mekaander. Die sloot in Ooldemark was al wel veur de helte leeg. Zol daor waeter uut de Lende in kommen? Hieronder een foto die ‘k vandaege maekt hebbe van de Driewegsluus.