Kurioskarke

Vandemorgen wodde ‘k beld deur Omroep Frieslaand mit de vraoge a’k vri’jdagaovend anschoeven wil in een pergramme op ‘e tillevisie. Et zol dan ok gaon moeten over hoe de perveensie mit et Stellingwarfs ommegaot. Ik hebbe d’r tegen anhikt. Nog meer wark… Ik verbroeze d’r gewoon in. Ik vien ok da’k zokke dingen niet zo goed kan. Ik hebbe dus aandere naemen nuumd. Dan moet d’r mar iene aanders naor de studio. Ik kan toch ok alles niet. Even laeter kwam d’r een mail mit de vraoge a’k weer wat vertaelen wil veur et Vlechtmuseum in Noordwoolde. Dat za’k morgen perberen te doen.

Ik moch vandemiddag verhaelen vertellen veur de leden van ANBO/PCOB in de Kurioskarke in Liwwadden. Et is al jaoren leden da’k daor veur de laeste keer vertellen moch. Mooi om es weer op dat plak te wezen. Et was een aldergenoeglikste middag. D’r was een mooie koppel volk op ofkommen. Et was trouwens haost een thuuswedstried. Foekje, de vrouw die de gezangen begeleidde is een kammeraodske van mien kammeraodske Tjerkje. En de veurzitter zee dat hi’j een volle neve is van Sieger, de man van Geertje. Over twie weken ma’k weer naor de Kurioskarke te vertellen!