Kring van Bercoop

Ik hebbe now al drie uutneudigings veur verschillende evenementen op 2 juni kregen. Dan komt in Berkoop een boek mit veldnaemen over Berkoop uut. In Spannum komt et boek De winskhoed fan Fortunatus van Waling Dijkstra uut in een bewarking van Abe de Vries. En in Liwwadden kigt Lutz Jacobi een tal fietsroutes anbeuden in verbaand mit et mooie perjekt Iisbaan yn ‘e maaitiid, daor ik ok an mitdaon hebbe. Et is allemaole mooi en ik hadde overal wel naor toe wild, mar ik bin al bezet. We hebben hier in Ni’jhooltpae dan de meitiedsvergeerdering van de Johan Veenstra Stichting. En ja, ik kan niet op mar liefst vier plakken toegelieke wezen.

Pieter komt hier aanst te eten. Ik hebbe eerpelpuree mit witlof, een hamburger, rebarber en boereyoghurt mit Spaanse sinesappel d’r deur op et menu staon. Daor zuwwe et mit doen moeten. Nao et eten gao’we tegere naor de jaorvergeerdering van de Kring van Bercoop die ieder jaor in mfc De Ni’je Stienze, hier in et dörp, hullen wodt. Hoogtepunt is ieder jaor de joekel van een gehakballe nao ofloop.

Hieronder dan nog een foto van gister uut et Dolfinarium in Hadderwiek. We zaggen daor wonderlik volk ommezakkebanen, dat ik hebbe d’r vandaege een kollum over schreven, die ‘k laeter nog een keer beter uutwarken en verbeteren zal.