Kornwerderzaand

Vandaege hewwe et Kazemattemuseum in Kornwerderzaand bekeken. Ik was d’r hiel vroeger een keer west., mar et is now vule mooier wodden. Et woord kazematten komt uut et Spaans en betekent huus van et doodmaeken. Eerst hewwe in et resteraantien wat drinken had mit wat lekkers d’r bi’j. In de filmzael van etzelde gebouw hewwe een film bekeken over de meidaegen van 1940, doe de Duutsers niet deur de Stelling Kornwerderzaand hennekwammen. Vervolgens hewwe de bunkers oftewel kazematten bekeken. Overal weren films te zien. Et was krek as maekten we alles mit. We zaggen de Duutse vliegtugen ankommen, heurden et lewaai van kenonnen. We zaggen de Duutse anval op oonze kannoneerboot Hr Ms Johan Maurits van Nassau, die de soldaoten in Kornwerderzaand te hupe kwam. We heurden de stemme van Keuninginne Wilhelmina… Kommedaant van de Stelling Kornwerderzaand was kaptein Boers. Nao de kapitulaosie gong hi’j in et verzet. Hi’j wodde in Kommando Oraniënburg van et konsentraosiekaamp Sachsenhausen deur de Duutsers doodscheuten. Vlak veur zien dood schreef hi’j een brief an zien beide zeunen. Die brief kowwe lezen. Hiel ontroerend… Et was overal een hiel geklauter, mar et was hiel mooi om alles te bekieken. We dochten dawwe et in een ure wel bekieken konnen, mar we hebben twienenhalf ure wark had. Van Kornwerderzaand biwwe, mit een grote omweg omdawwe niet goed opletten, naor resteraant De Fûke in Echten reden. Daor hewwe overheerlik eten. Wat hebben ze daor toch lekker eten! Et was gien mooi fotoweer, mar hier toch een foto van ien van de bunkers