Koosje

Laot et niet waor wezen, mar et is wel waor. Eregister belde Chiel, vandaege ston et in de kraante en kwam de rouwkaorte over de post. Koosje is d’r niet meer.

Jacoba Jantine (Koosje) Hornstra-van Elselo wodde geboren op 18 september 1945 en raekte uut de tied op 29 feberwaori 2024.

Et is kompleet onbegriepelik da’k heur niet meer op ‘e mark in Wolvege tegenkommen zal. Of bi’j een bi’jienkomst van de Stellingwarver Schrieversronte daor ze deur de jaoren henne zovule wark veur daon het. Ze was zoe’n aorige en lieve vrouw, wat zuwwe die missen. Mar dat gelt vanzels veural veur heur man Chiel en heur zeunen Michiel en Frank. Ze lat een grote leegte aachter. As d’r wat mit mi’j te redden was, was Koosje d’r altied bi’j. Hieronder een mooie foto van heur, die neumen is op 2 april 2011 doe ik een fesien gaf veur mien 65^ste verjaordag. Koosje was goed een vorrels jaor oolder as ik bin. Ze leup zodoende al de jaoren deur een aentien veur me uut. Dat dot ze now niet meer en dat is gruwelik.