Kollums

Ik wodde vandemorgen wakker in een witte wereld. D’r lag een laogien sni’j op velden en huzen. Vandemiddag was de zunne d’r ok bi’j, dat leek dus prachtig. Dit is hiel wat mooier weer as die vieze, natte riete die we had hebben. Et is trouwens wel koold. Mar ik hebbe vandemiddag, drekt nao et eten, een kleine kuier maekt aachter mien huus uut en de foto maekt die onder dit stokkien staot. Vandemiddag he’k nog twie kollums in klad schreven. Ik zal ze laeter nog uutwarken, verbeteren en veraanderen. De iene kollum gaot over al mien optredens. Ik bin 3.252 keer et pad uut west om overal uut eigen wark te vertellen. Dat is haost altied goed gaon, mar ok een keermennig is et op een komplete mislokking uutlopen. Die keren vergeet ik nooit. Zoas die keer dat ik et verhael Stellingwarver Chippendales vertelde in een  bekend Drents dörp… Ik hebbe ok een kollum schreven over mien legere schoeletied doe ‘k in de klasse zat bi’j juffer Peenstra. Et was een kompleet aandere tied, niet mit disse tied te vergelieken. Aj’ oolder wodden kiek ie stiekem toch wat vaeker een tikkeltien mankeliek aachteromme naor vroeger. Mar dat moet vanzels ok niet al te vaeke, want ik leve en warke in disse tied.