Johan Veenstra
Stellingwarver schriever en verteller

Kollum

Plaetst op 8 jannewaori 2022.

Mien kollum Leedanzeggers in de Liwwadder Kraante van vleden deensdag het nogal wat losmaekt. Ik schreef in die kollum o.a.: Ik beginne dit ni’je jaor zuver wat moedeloos. Ik kreeg daor gisteraovend ok nog een lange mail over. De betreffende man mailde me dat hi’j geneuten hadde van de kollum en dat et him ok ontroerd hadde. Ik vun zien reaktie ok hiel aorig en ontroerend. Mar… wi’j daenken niet hielemaole etzelde over bepaolde dingen. Een peer regels uut zien mail: Dan krijg ik bijkans een brok in m’n keel en schieten me de liefdevolle en vertroostende woorden te binnen: ‘Komt allen tot Mij die vermoeid en belast zijt, en ik zal u rust geven.’ Woorden van Gods Zoon Jezus Christus, die Johan, voor mij, voor ons, en ook voor jou gekomen is en die ons een vrede in het hart wil geven die alle verstand te boven gaat. Hi’j vreug me as ik op zien mail reageren wil… Mar netuurlik doe ik dat. Meensken kriegen altied een mail of brief van me weeromme. Hi’j vreug ok as ik niet es ankommen kan. Dat is een aorig en lief verzuuk. Mar… waor de man en zien vrouw wonen is niet echt bi’j mi’j naost de deure. Meensken moe’n toch aenlik wel begriepen kunnen da’k niet overal ok nog op vesite gaon kan. Dan zo’k haost niet meer an schrieven toekommen. Al bin d’r vanzels altied uutzunderings.

Ik kreeg in de eerste weke van et ni’je jaor al twie brieven van mien now toch wel vaaste briefschriever uut Makkum. Ik hebbe vandaege een lange brief weerommeschreven. Brieven over po√ęzie, keunst, de netuur en et leven. Mien uutgever moet disse briefwisseling mar goed in de gaten holen! Verscheen d’r laestdaegs, vuuftien jaor nao zien dood, niet nog een bundel mit brieven van Gerard Reve an Jef Rademakers? Misschien zicht mien uutgever hier laeter ok nog wel brood in en breng ik jaoren nao mien wegraeken nog een flut geld op!