Kollum

Ik hebbe verschillende aorige reakties kregen angaonde de kollum Jarmo die gister in de kraante ston. Jarmo is de man die mi’j ni’je komputerboel leverd het en me vanuut et Stienen Tiedpark van Windows 7 naor Windows 11 brocht het. Butendat het hi’j mit me mit west en koop een smartphone. De warking van zoe’n ding het hi’j me ok allemaole uutlegd. Op mien oolde dag kan ‘k now ok appen! Et is toch wat! En dan hewwe tegere ok nog een ni’je auto veur me kocht. Omda’k overmorgen een oolde, straampelige man bin, wodt et iene mit een wat hogere instap en een automaat. As de auto d’r is gaot hi’j weer mit en dan legt hi’j me ok uut hoe et rieden in een automaat gaot. Dat doen we dan op et grote parkeerterrein bi’j Thialf. Ik bin slimme bliede da’k him kenne, want allienig redde ik et gewoon niet op mit al dat technische gedoe. Et mooie was gister dat verschillende meensken de kollum naor Jarmo stuurd hebben. Hieronder dan nog een foto die ‘k gister maekt hebbe in de Iesselhallen in Zwolle op et Iesbeelde Festival. Dit is Neptunus. In de Romeinse mythologie was dat de god van de zee.