Kollum

Ien keer in de veertien daegen, altied op deensdag, staot d’r een kollum van mi’j in de Liwwadder Kraante. Vandaege ok, mar dat die d’r in staot het nog hiel wat haelen om de klinke had. Want ja, een peer weken leden kree’k de tiedinge dat alles aanders mos wat et insturen van een kollum anbelangde. Waoromme moet alles toch altied aanders? Ik hebbe nog beld mit een overigens slim aorige vrouw van et Dagblad van et Noorden die daor over gong. Ik hebbe nog veursteld om et veur de wissighied eerst ok nog op ‘e oolde meniere in te sturen. Ik zag et al misgaon… Mar dat moch niet, et mos drekt op ‘e ni’je meniere. Dat ik hebbe krek as aanders een stokkien uuttikt. In plak van de titel mos ik now mien naeme bovenan et stokkien zetten en et tussenkoppien mos ik d’r dan ok zels tussenfrommelen. De titel mos dan as onderwarp van de mail zet wodden. God zegene de greep! Ik hebbe de kollum opstuurd en simsalabim d’r kwam zoas beloofd zoe’n automatisch mailtien weeromme dat alles goed ankommen was. En doe wodde ‘k niet al te goed en he’k d’r veerder gien andacht an besteded. Mar gister kree’k inienend een mailtien van de kultuurredaktie van de Liwwadder Kraante. Ze konnen wel zien da’k wat toestuurd hadde mar konnen allienig de titel mar te veurschien toveren. Zi’j wussen ok niet hoe alles percies mos. A’k de kollum wel op ‘e oolde meniere toesturen wol. Dat he’k doe gistermiddag nog daon en daoromme staot de kollum vandaege toch in de kraante. De volgende kollum stuur ik op beide menieren in. As dat now mag of niet. Waoromme moet alles toch altied aanders? Et levert bi’j een protte meensken allienig mar stress op. Mar ja, ik bin vanzels een oolde man die een hekel an alle techniek het. As iederiene zo was as mi’j schreven we nog mit een gaanzevere.

Wat is et kil en ontiederig weer. Twie weken leden veerden we nog in de boot op et waeter. Lekker in de kotte broek en een shirtien mit kotte mouwen. En now he’k de trui an. Mar de haast kan ok mooi wezen. Disse foto maekte ‘k doe et nog mooi weer was, mar de haast klopte doe al an de deure.