Koekoeksjong

Ik hadde de vriezer zowat hielemaole leegeten. Dan is de eerste paosdag een mooie dag om dat ding te ontdujjen en schone te maeken. Dat he’k vandaege dus daon. Now kan d’r weer een protte lekkers in! Ik hebbe vanzels ok nog wat korrektiewark veur et ni’je boek daon en verhaelen rippeteerd veur de beide optredens van ankem weke.

Ik hebbe de ni’je roman, Koekoeksjong, van Camilla Läckberg lezen. Et elfde diel van de Fjällbacka-serie, een internationaole bestsellerserie over pelisieman Patrik Hedström en schriefster Erica Falck. In dit boek wodt een beroemde fotograaf dood vunnen in een showroom en Henning Bauer, de vermoedelike Nobelprieswinner veur literetuur, wodt anvalen op et eilaand daor hi’j een huus het en vaeke zit te schrieven. Patrik Hedström en zien kollega’s onderzuken beide zaeken. Intied gaot Erica Falck (de vrouw van Patrik) an de slag mit een cold case: de moord op een transgender vrouw in de jaoren tachtig. Alles liekt mit mekaander te maeken te hebben… Een prachtig en spannend boek! Mar dat biwwe wend van Läckberg!