Knieperties en rollegies

Ik hebbe vandemiddag naor kapster Bertha in Et Vene west. Ik hebbe eerst een koppien thee mit een kniepertien had. Bertha komt uut Drenthe. Vandaor! We praoten altied Stellingwarfs en Drents tegen mekaander. Ze het vervolgens een ure mit me doende west en krieg de boel weer wat in ’t fesoen. Daornao hewwe tegere een kop overheerlike snet had. Daor is et echt weer veur. En doe nog een plakkien desembolle mit geitekeze mit nog een koppien thee. Zoas ieder jaor kree’k een poedegien mit knieperties en rollegies van heur mit naor huus toe. Ik kan now in ieder geval netties de diek uut naor twie bi’jienkomsten daor a’k vandeweke nog henne zal. Doe ‘k thuus kwam was d’r via de mail een verzuuk kommen veur een grote klus mit betrekking tot de gemienteraodsverkiezings. Dat doe ik dus niet. Ik moet et ommes wat rustigeran doen. En ze vienen grif wel een wat jongere en flitsender man of vrouw die utermaote geschikt veur zoks is. Ik stoppe ankem jaor ok mit et almar riegelmaotig schrieven veur et Stellingwarver tiedschrift De Ovend.