Klongel

Eregister ston in dit dagboek dat de printer kuren hadde. Gisteraovend belde mien komputerman Jarmo vanuut Spanje. Hi’j was in Portugal mit vekaansie, mar is daor in een huurauto naor zien oolden gaon. Die hebben een huus in Galicie, dat is et pat van Spanje dat boven Portugal ligt. Et was mar 200 kilemeter rieden. En zien moeder lest dit dagboek, dat zodoende wus hi’j van de printer.We hebben videobeld. Hi’j kon mien printer bekieken, ik kon bi’j heur in huus en op et terras kieken. Et was zo weer klaor, ik hadde de verkeerde kleur inkpetrone verwisseld. Zoks is hiel klongelig. Ik hebbe now heur huus daor wel mooi bekieken kund. Een mooi huus mit drie slaopkaemers. En wat een gruun d’r ommehenne! Dat ha’k nooit docht. Ze zitten daor prachtig. Ik kan me veurstellen dat ze nao oonze videobelderi’je mit ’n drienend lekker op et terras zatten. Glassien wien d’r bi’j, pilsien, schaoltien mit aepeneuten, blokkies keze en wost… En doe hebben ze grif tegen mekeer zegd dat die man uut Ni’jhooltpae best wel een aorige en goeie man is, mar wel wat klongelig. As ze dat zegd hebben, hebben ze groot geliek. Mar wat heb ik een geweldige komputerman. Om me in de vekaansie vanuut Spanje te helpen! Of zol d’r now een peperdure rekening kommen? Komputerhulpe in de aovenduren, tiedens de vekaansie en vanuut Spanje… Ik moet et mar ofwaachten.

Vandaege he’k een fietstochien van 42 kilemeter maekt. Bi’j de Lende langes naor de Driewegsluus en doe naor de Scheenesluus. De theetuun was dichte, mar ik hebbe d’r wat brummels plokt. Bi’j de Ooldelaemster Brogge he’k een bakkien drinken en een boltien hamburger had veur zes euro. Daor is overhenne te kommen. Daor in de buurt he’k een stokmennig peerden op petret zet. In Wolvege bin ‘k bi’j et huus van Jarmo zien oolden langesreden. Et huus staot d’r nog!