Kleren kopen

Et was vandaege alweer prachtig weer, mar we hebben niet fietst. Dat doe ik morgen wel weer. We bin vandemorgen in de auto naor Rinsma op ‘e Gediek gaon. Ik was zo van doel om veur mezels niks te kopen, mar dat is niet lokt. Ik hebbe een hiel appat truigien mit een bi’jpassend shirtien kocht veur mien verjaordag. We hebben daor een bakkien drinken had an de bar. Ik wodde daor deur volk uut Burgum herkend. Ze kenden me van de kollums en weren al es bi’j een optreden west. Vervolgens biwwe naor Tuundorama in Drachten-Zuud west. Daor he’k ok van alles kocht. Alvast spul veur de voegelties, ni’jjaorskaorten, tietelozebollen en een mooie lidkaktus. Vanuut et resteraant reupen meensken mien naeme. De vier meensken die daor zatten, hawwe daor al es twie keer eerder zien. Doe zatten ze ok in et resteraant. Ze vertelden me dat dit heur wekelikse daggien vot was. Naor Tuundorama en dan wat drinken mit een lekkere frikandelle d’r bi’j! Wi’j hebben vanaovend lekker eten bi’j Van der Valk in Wolvege. Doe ‘k weer thuus was, weren d’r twie berichten kommen angaonde mien kollum Leeftied die vandaege in de kraante staot. Doe ‘k die kollum donderdag votstuurd hadde, scheut me in de zin dat et woord ooldtestementisch aenlik ni’jtestementisch wezen mos. Ik hebbe et mar zo laoten, mar vanzels bin d’r altied schraandere meensken die dat zien. Frits uut Sneek. Opstaandings nao de dood kommen in et Ni’je Testement veur. Meerdere meensken is zoks indertied overkommen. In et Oolde Testement niet, daenk ik zo. Alhoewel daor ok zat wonderlike dingen in gebeuren. Koop vreug wat laomerstat betekende. De stat van een laom dus en dat dinkien is slim bewegelik. Bekiek et mar es. Koop mailde dat hi’j van huus uut Friestaelig is, mar hi’j hadde op ‘e straote in Echten indertied Stellingwarfs leerd. Hi’j mailde me ok in et Stellingwarfs. Hieronder nog een foto. Bi’j Tuundorama wodde al warkt an de kastshow. Ik vien dat aenlik bespottelik. De kastdaegen bin eerst over een vorrels jaor!