Kleine opleving

Ik hadde een kleine opleving wat et schrieven van gedichten anbelangt. Ik doe dat haost niet meer. Mar doe vreug de gemiente me om een gedicht te schrieven naor anleiding van de waetersnoodramp van 1825. Doe heb ik dus Schoelplak schreven. Vervolgens vreug et bestuur van oons mfc om daor een gedicht over te schrieven. Dat he’k ok daon en dat is Huus van et dörp wodden.  Now ja en doe he’k veur mezels de gedichten Naachtboot en Déjà vu ok nog schreven. En now is et wel weer meer as genoeg!

Vandaege het Anke de boel hier schonemaekt en ik hebbe vandemiddag op ‘e fiets naor mien aachterneve en iemker Piet in Wolvege west om acht potten hunning. Ik haele zeker twie keer in et jaor acht potten op. Ik bruuk et in de thee en a’k een ontbijtkoeke bakke. Ik hebbe d’r een peer bakkies thee had en we hebben genoeglik wat bi’jpraot. Wiels ik vot was hebben Piet Bakker en de vrouw et boek Bergveld lest veur uut eigen wark hier anbrocht. Die weren ok uut fietsen. Et lag op ‘e taofel in de kaemer doe ‘k weer thuuskwam. Ik kenne Piet nog van de ulo en zien dochter zie ik in et ziekenhuus a’k een daarmonderzuuk hebben moet. Nao de vesite an mien aachterneve he’k Hooltwoolde en Der Izzerd nog ommefietst. Ik hebbe ok een foto maekt van et oolde stoomgemael van Der Izzerd. Zie hieronder.

Morgen stao ik mit een boekekraom  op ‘e hobbymark in et dörpshuus van Beetsterzwaog. Kom mar bi’j me langes en koop mar een boek van me! En maek daor dan mar een kuier deur de bossen!