Kleine fietstocht

Ik hadde vandaege aenlik mit iene vot zuld, mar dan ha’k meer as 200 kilemeter autorieden moeten. Dat zit d’r op et ogenblik niet in. Ik vule me as zit ik tegen een overspannenhied an. Ik maeke mien agenda tot begin september leeg. Ik zegge alderhaande dingen of, verstelle daotums en neme veur die tied niks an. Wat overblift is lezen, wat fietsen en mit de boot vot. Aanders niks. Ik hebbe vandaege een fietstochien van 40 kilemeter maekt. Et was hiel bewolkt en mar 20 of 21 graoden. Eerst om 2 ure kwam de zunne d’r bi’j en leup de temperetuur op naor 27 graoden. Mar doe was ik al lange weer thuus. Ik bin bi’j de Lende langes en via de Driewegsluus naor de Scheenesluus fietst. D’r ston vleden weke een groot stok in de kraante over de ni’je eigener van meule, woonboot, tentoonstellingsruumte en theetuun. Die is dus weer los. Prachtig is dat. Et was d’r drok. Daor he’k dus heerlik zeten an et waeter en tussen bloemen en vlinders. Ik hebbe d’r wat drinken had mit een waarme panini schinke/keze. Ik hebbe ok nog een peer lekkere stokkies kruudkoeke mit naor huus neumen. De Braandemeer bin ‘k niet ok nog deurfietst zoas aanders, mar over Ooldelaemer bin ‘k rechtstreeks op huus an gaon. Hieronder een foto van de meule en de ingang van de theetuun.