Klein fietstochien

Vandemorgen he’k een kollum die ‘k al in klad schreven hadde nog even hielemaole naokeken en wat befiekt en doe uuttikt. Een kollum die pas over een vorrels jaor in de kraante komt. Vlak veur mien verjaordag in jannewaori. A’k et zolange volhole… Mit alle malle berichten over tal van meensken is et krek as loop ik meer en meer op driefzaand… Et was, krek as gister, de hiele morgen slimme diezig. Mar om et middagure henne brak de zunne d’r weer deurhenne en wodde et weer een prachtige middag mit 19 graoden, volop zunne en weinig wiend. Schitterend fietsweer. Ik hebbe een bescheiden tocht van krap dattig kilemeter maekt. Ik bin bi’j de Kuunder langes naor Berkoop fietst, daor he’k wat bosschoppies daon, en doe bin ‘k veerderfietst over Zaandhuzen, Noordwoolde en De Hoeve weer naor huus toe. Hieronder een foto die ‘k maekt hebbe van de sluus an de Kuunder in Ooldehoorn. Mag et morgen asjeblief ok nog zoe’n mooie dag wodden? Ik kriege d’r gien genoeg van. Mar ja…