Klaine oade

Op ‘e webstee van Ensafh staot een kollum van de Bildtse schriever Hein Jaap Hilarides en de titel is Klaine oade an Johan Veenstra. Dat is niet gek. Hein Jaap schrift o.a.: Wat is humor? Ok soa’n fraag. Je hewwe humor om te lachen en humor der’t je niet om lache kinne. Tot die eerste kategory hoort Johan Veenstra. Johan sait dingen die’t aigenlik niet kinne. Dat is ’n kenmerk van de grap. En dat faset beheerst de Stellingwerver tot in de perfeksy. Now, dat is toch mooi! Hein Jaap en ik hebben wel es tegere optreden mit een Fries of Friezen d’r bi’j. De laeste keer was een peer jaor leden doe we mit Nyk de Vries een pergramme verzorgen mochten in schouwburg De Lawei in Drachten.

En veerder lopt alles me over de hoge schoenen henne. Ik hebbe de beide tuunmannen Arnaud en Jacco al twie daegen om de deure. Ik kriege een ni’j schut aachter et huus. Et oolde wodde deur de klimop nog wat overaende hullen mar was hielemaole an ’t aende. Ik zorge dus morgens veur koffie mit wat d’r bi’j en tussen de middag veur soep en frisdraank. En veerder mos ik mien agenda hielemaole overhoop haelen. Ik kon vandemorgen niet naor fysiosport, dat ik zal daor ankem weke twie keer henne. Ik bin gister nog wel even naor mien belastingman west mit pepiereboel en ik hebbe een coronaprikkien kregen. En doe zo’k ok nog naor de prissentaosie van een ni’j tiedschrift in West-Stellingwarf daor een gedicht van me in staot. Wethoolder Hanneke Zonderland zol et eerste exemplaor uutreiken. Deur alle drokte wa’k hielemaole in ’t wilde en vandemiddag om vier ure in resteraant Bruiss. Mar ik hadde d’r gistermiddag om vier ure wezen moeten. Ik hebbe mien verontschuldigings naor de gemiente stuurd. Et is te drok en te roezig. Morgen bin ik mit Haarm naor Fier dyn eigen Tael op et Bildt. Deensdag kommen de tuunmannen weer. Ik betwiefele as d’r ankem weke een daggien vot in zit.