KFFB

Vandemiddag om half iene bin ‘k op et carpoolplak bi’j Ooldeschoot in de auto stapt bi’j Jelle en Grytsje Kingma en we bin naor de Kurioskarke in Liwwadden gaon. Daor was de jaorvergeerdering van de KFFB. De Kristlik Fryske Folksbibleteek. Jelle is ponghoolder van disse boekeklub en Grytsje en ik mochten nao de vergeerdering een pergramme mit Friese lieties en Stellingwarver verhaelen brengen. Dat gong hatstikke goed. Grytsje en ik hebben al meerdere keren tegere optreden. Dit was ok een betien een trieste bi’jienkomst, want de KFFB wodt over twie weken tiedens heur laeste vergeerdering opheven. De Friese boekeklub is opricht in 1935 en het dus 90 jaor bestaon. Op et hoogtepunt weren d’r mar liefst 12.000 leden die jaors drie boeken kregen. De Stellingwarver schriefster Peggy Klinkhaemer gaf daor ok boeken uut. Ik bin mit Pieter wel es bi’j zoe’n prissentaosie west in et Oranjehotel. Daor weren wel een peer honderd meensken. Vandemiddag weren d’r ongeveer 35 meensken. Hendrik en Beitske weren d’r ok en schriever Anders Rozendal! De KFFB het gien 12.000 leden meer, mar nog ongeveer 460. Et kan en gaot dus niet meer. Dat is aenlik meer as droevig. Wat gaot d’r wat moois verleuren… Ze stonnen vroeger naost oons op ‘e Boekemark in Drachten. Die is d’r ok al niet meer. En hoe komt et over een tal jaoren mit de Stellingwarver Schrieversronte? Ik hebbe et laeste nommer van heur kraante De Fleanende Krie mitkregen en et laeste boek dat ze uutgeven hebben: Doe’t Johan in kealtsje krige van Astrid Lindgren, dat uut et Zweeds vertaeld wodde deur Martsje de Jong. De KFFB het in die 90 jaor mar liefst 518 boeken uutgeven. Kun de KFFB-schrievers now wel een aandere uutgever vienen? Veur vanaovend ha’k een uutneudiging en gao naor een veurstelling in Noordwoolde van Drenthe Plat, et gezelschop van Fred Rootveld uut Bornerbroek, mar dat wodt me gewoon wat te drok. Ik moet wel een betien op mezels passen. Hieronder een foto van Grytsje Kingma en mi’j. We zitten hier an et oranjegebak veurofgaonde an de middag in de Kurioskarke. Ik hope dawwe tegere nog es optreden kunnen!