Keuperdieven

As ik mit de trein vot bin, gaot d’r vaeke wat mis op et spoor. Doe ‘k gistermorgen overstapte in Zwolle in de stoptrein naor Utrecht kwam die bastendevol te zitten. Lange niet iederiene kon zitten. De vrouw  naost me vertelde dat d’r keuperdieven op et spoor aktief west weren en dat verschillende treinen now niet reden. De treinen van Zwolle naor Kaampen reden hielemaole niet. Ik kwam in ieder geval zonder kleerscheuren in Nunspeet. Mar op ‘e weerommereize was et mis. De trein gong niet veerder as ’t Hadde, dat is mar ien stesjon veerder. Daor mossen we d’r uut en in een bus veerder naor Zwolle. De trein vertrok daor ok op een aander perron. Doe de trein naor Liwwadden d’r ankwam ston d’r niet instappen op. Wat now weer? Mar… we mossen toch in die trein. Ik bin uuteindelik weer goed thuuskommen. Mar de ov-treinkaorte was ok van slag deur alle in – en uutchecken. In Wolvege mos d’r uutchecken kommen te staon mar d’r kwam inchecken te staon. Hopelik gaot et weer goed a’k binnenkot weer mit de trein votgao.

De veurige maond raekte Patricia Routledge uut de tied. Zi’j speulde Hyacinth Bucket in de serie Keeping up appearances oftewel Schone schijn. In verbaand mit heur wegraeken wo’n alle ofleverings van die serie aovens om zes ure herhaeld op ONS. Ik kieke vanzels en vien et nog krek zo mooi as vroeger. Op diezelde zender kiek ik ok geregeld naor ofleverings van Wordt u al geholpen? Dat vien ik ok nog altied lieke mooi as vroeger. Nao de oflevering van Schone schijn za’k vanaovend naor de Welkoop in Wolvege. Meensken die een klaantepassien hebben kun vanaovend alles kopen mit 20 percent kotting. En dan bin ik d’r bi’j! Hieronder nog een foto van gister. Nunspeet in de haast.