Keuningsdag

Eindelik hawwe weer es een gewone Keuningsdag nao die twie vervelende coronajaoren. Mooi dat et weer kon! Ik hebbe vandemorgen naor de feestelikheden in Mestricht keken. In et verleden kwammen Haarm (Harmen Houtman) en ik daor jaorliks een peer daegen op bezuuk bi’j Alice Heynen, die we kenden van een Duutse kestelereize en die in een flat an et Keuningsplein woonde. Haarm en ik sleupen dan in hotel Steijns, vlakbi’j et Centraol Stesjon. Daoromme was et zo mooi om al die bekende plakkies vandemorgen op ‘e tillevisie te zien. Et was trouwens ok een mooi feest mit die prachtige meziek van André Rieu en Rowwen Heze. Goed dat de keuning et ok over Oekraïne hadde. Wi’j kun hier in alle vri’jhied feestvieren, mar een peer honderd kilemeter veerderop zitten een protte meensken dikke in de ellende. De keuning is vandaege 55 jaor wodden. Ik wete nog percies waor a’k was doe hi’j geboren wodde. Ik lag doe as dienstplichtig soldaot in de Generaol Spoorkezerne in Ermelo. Aovens gong ik mit Gert Oostingh uut Zwolle vaeke naor de film in de bioskoop op et kezerneterrein of we weren mit oonze hobbies doende in et Stafgebouw van et 103 Geneeskundig Bataljon. Op ‘e aovend van 27 april 1967 zatten we in de bioskoop en doe wodde de film inienend onderbreuken en wodde d’r bekendmaekt dat Beatrix een zeune kregen hadde. Dat is vandaege 55 jaor leden… Vanaovend is d’r ok weer een Oranjekonsert van de kristelike Brassband Euphonia in sporthal De Steense in Wolvege. Gaasten bin The Billy Joel Experience. Lange jaoren he’k in et verleden an et Oranjekonsert mitdaon, ik hebbe et zels een jaormennig prissenteerd. Dat weren mooie jaoren! Vanaovend gao ‘k heerlik genieten!