Keuningsdag

Vandemorgen he’k naor de ofscheidsplechtighied veur paus Franciscus op et Sunt Pietersplein keken. Laeter ree een soortement pausmobiel mit de kiste mit de paus deur Rome naor de baseliek van Santa Maria Maggiore. In diezelde baseliek trouwde op 29 april 1964, een dag veur Keuninginnedag, oonze preenses Irene mit preens Carel Hugo van Bourbon Parma. Irene heur femilie moch d’r van et Kammenet niet bi’j wezen omdat Carel Hugo keuning van Spanje wodden wol. De femilie keek zodoende op kesteel Warmelo naor de huweliksplechtighied op ‘e tillevisie en doe… vul daor de stroom uut. Nao de plechtighied wodden Irene en Carel Hugo ontvongen deur paus Paulus VI. Vandemiddag he’k naor de feestelikheden in Doetinchem keken. Wat een protte volk was daor en wat was et mooi weer. Et was mooi dat et mooie Aachterhoeks ok an bod kwam. En vanaovend bin ik veur et eerst sund een kleine dattig jaor thuus op disse dag omdat d’r van ’t jaor gien  Oranjekonsert in Wolvege is. Dat is hiel arg spietig. Mar ankem jaor wel weer.