Kesteel Ruurlo

Mien auto is vandaege ien jaor oold en ik hebbe d’r in dat eerste jaor 9.442 kilemeter mit reden. Ik kreeg een fielsetaosie via de mail van Seat. Daor ston zoe’n stom woord in da’k d’r een kollum over schrieven zal. Et is vandaege 59 jaor leden da’k onder dienst gong en mit de trein naor Amersfoort reisde.

Vandaege bin ‘k ok mit de trein op stap west. Laestdaegs kreeg ik een mailtien van een dagboeklezeresse die me anraodde en gao es een keer mit de trein naor kesteel Ruurlo, naor de tentoonstelling Schattig & kattig. Now ja, ik hebbe een treinkaorte en ik bin gek op katten, dat ik hebbe mit de trein naor kesteel Ruurlo west. Ik mos onderweg overstappen in Zwolle en Zutphen. Ik was al es twie keer eerder in et kesteel west. Ik bin d’r in de auto mit Fettje west en vleden jaor zatten Jelle en ik in een husien in Lochem en omdat et doe haost altied mal weer was hewwe doe ok in de auto vanuut Lochem naor kesteel Ruurlo west. Ik hebbe daor vandemiddag eerst wat eten en drinken had in de Oranjerie bi’j et kesteel. De tentoonstelling was mooi en et was d’r slimme drok. Poezen van textiel, beelden en schilderi’jen van poezen. En d’r was een mooie film te zien over de katten die onder et Winterpeleis/de Hermitage van Sunt Petersburg huzen. In de auto van Wolvege naor huus toe bleek d’r tussen Hooltpae en Ni’jhooltpae een ongelok west te hebben. De hiele weg was ofsleuten. Alle verkeer mos deur Ni’jhooltpae. Op internet zag ik dat d’r vier auto’s bi’j betrokken weren en dat d’r zeuven gewonden weren. Jakkes nog an toe… Hieronder nog twie foto’s van vandaege. Boven: et mooie kesteel Ruurlo. Onder: ien van de schilderi’jen die op ‘e tentoonstelling te zien is. Ralf Kokke (1989) Poopoo, 2023, krietvarve op doek. Poes Marja kwam mauwende bi’j de veurdeure doe ‘k thuuskwam!