Kedoboek Friese Boekeweke

Vandemorgen he’k naor fysiosport west. Daornao he’k een bakkien drinken had bi’j Jarmo en doe bin ‘k naor Et Vene gaon. Mien rechterheurapperaot laedet naachs soms niet op. Ze gaon d’r niks an doen. Ze weten ok niet wat d’r dan percies is. As et vaeker veurkomt moet d’r wel wat an daon wodden, mar niet as et zo now en dan mar es veurkomt. Dat is dan mar zo en fleurig veerder.

Ik kan jim vandaege de veur- en aachterkaant van et kedoboek van de Friese Boekeweke zien laoten. Zie hieronder. Et zicht d’r prachtig uut, vien ik. De Friese Boekeweke is van 31 oktober t/m 8 november. Wie dan veur 15 euro an Friese boeken kocht, krigt dit boek d’r gratis bi’j. Et kedoboek wodt op vri’jdagaovend 30 oktober prissenteerd tiedens et Friese Boekefeest in Tresoar in Liwwadden. Zes schrievers hebben d’r een verhael veur schreven: Gabrielle Terpstra, Marije de Lange en Martsje de Jong in et Fries, Gerard de Jong in et Bildts, Henk van der Veer in et Snekers en Johan Veenstra, dat bin ik dus, in et Stellingwarfs. De titel is dan ok Zesse in de ofzunderlike taelen: Seis Ses Zesse Ses. Et boek wodt uutgeven deur Eddy van der Noord van uutgeveri’je Louise in Grou. De saemenwarking mit Eddy was geweldig! Vier taelen, zes stemmen en werelden die vertrouwd lieken, mar de hieltied weer een verrassende dri’j nemen. Humor, tragiek en beschouwend proza. In wisselende saemenstelling treden de schrievers tiedens de Boekeweke in verschillende plakken in de perveensie op. Ik mag mit aanderen optreden in Et Vene en Sneek. Zie veerder www.fryskeboekewike.frl  Mien verhael hiet Parredies. Ooit he’k schreven dat mien oolde huus et parredies van mien kiendertied was. As oolde(re) man vraog ik me of as dat echt wel zo was. Een prachtig kedoboek!