Kedoboek 2026

Doe ‘k gister in Noordwoolde was kree’k nog een bestelling van mien laeste boek Naozoemerlaand. Dat he’k vandemiddag op ‘e fiets naor Noordwoolde Zuud brocht. Daornao he’k uutzocht waor Fettje now percies woont. Wat een mooi en groot huus! Ik hebbe d’r twie bakkies drinken had en we hebben alles even bepraot. Zundag zien we mekeer al weer, dan maeken we tegere een boottocht over et Lauwersmeer. En et wodt prachtig mooi weer!

Et hoeft now niet langer geheim te blieven. Et ston in de kraanten en et was op Omroep Frieslaand. Ik mag een verhael leveren veur et Kedoboek 2026. Aj’ tiedens de Friese Boekeweke veur minstens vuuftien euro an Friese boeken kopen, kriej’ daor een kedoboek vergees bi’j. De Friese Boekeweke is van ’t jaor van 31 oktober t/m 8 november. De jaoren deur wodde d’r altied iene Friese schriever vraogd om et kedoboek te schrieven. Van ’t jaor bin d’r zes schrievers vraogd om een vri’j lang verhael van ongeveer 4.000 woorden te schrieven. Et kedoboek wodt van ’t jaor uutgeven deur uutgeveri’je Louise in Grou van Eddy van der Noord. Hi’j het zes schrievers vraogd en niet allienig schrievers die in et Fries schrieven, mar aandere kleine taelen kriegen ok heur gerak: Stellingwarfs, Bildts en Snekers. Dat vien ik hiel mooi. Eddy zegt: De latte leit heech. En foar de lezers is myn boadskip helder: dit kadoboek meie jo net misse! Gao in de Friese Boekeweke dus naor de winkel, koop een boek en steun mitien  de kleine taelen. De bundel krigt as titel: Libje fanut gelok. Et verhael dat d’r van mi’j inkomt hiet Parredies, et telt 4.554 woorden en et gaot over mien oolde huus. In een gedicht nuumde ik dat ooit et parredies van mien kiendertied. Twie jaor leden he’k bi’j mien oolde huus een peer daegen in een B&B zeten en ik hebbe me doe ofvraogd as dat inderdaod zo was. Was et wel een parredies? Et is een persoonlik, ontroerend, waarm en kwetsber verhael wodden.

Hieronder de zes schrievers naost mekaander. Jacob van Essen het oons een peer weken leden in de Liwwadder binnenstad hiel mooi op petret zet. Van links naor rechts: Marije de Lange (Fries), Johan Veenstra (Stellingwarfs), Martsje de Jong (Fries), Henk van der Veer (Snekers), Gerard de Jong (Bildts) en Gabrielle Terpstra (Fries).