Katten

Ik hebbe vandemorgen de fiets naor de fietseman brocht veur een servicebeurt en ik hebbe zolange een aandere fiets mit weerommekregen. Vandemiddag nao vieren he’k mien eigen fiets weer ophaeld, mar hi’j moet nog een keer naor de fietseman. D’r mos ok appat wat rippereerd wodden en dat zol tegere mit de servicebeurt gebeuren. Mar now hadden ze alle onderdielen niet en et dee ok blieken dat et stuur wat verbeugen was. Dat zal wel, mar ik hebbe d’r al fietsende niks van verneumen. As de onderdielen d’r binnen, krie’k daor tiedinge van en dan za’k d’r weer mit de fiets naor toe. Ik hebbe hier overdag de kollum, die ‘k gister in klad maekt hebbe, hielemaole verbeterd en bi’jwarkt en in de komputer stopt.

Ik hebbe et boek Katten van Andrew Edney lezen en veural ok bekeken. De ondertitel is van wilde katten tot lieve poezen. Et is een boek vol ofbeeldings van schilderi’jen die de meerst beroemde schilders deur de iewen henne van poezen maekt hebben. Hieronder een veurbeeld uut et boek. Dit is et schilderi’je Jonge vrouw met kat uut 1875 van Pierre Auguste Renoir (1841-1919). Disse katte zicht d’r wat benauwd uut omdat hi’j deur dat vrommesien onhaandig vaastehullen wodt