Kattekedogien

As kiend kuj’ de schoe opzetten en dan dot Sunderklaos of wat veur soort Piet dan ok daor een kedogien in. Ik hebbe in huus sloffen an. Doe ‘k vandemorgen van bedde kwam trok ik die drekt an. Et was krek as zat d’r wat in de linkersloffe. Ik schuddede de boel uut en docht dat d’r een stok voering uutvalen was. Ik pakte et op… Et was een platte, dooie moes. Harrekrastes nog an toe. D’r is mar iene die dit kedogien d’r mit ongetwiefeld de beste bedoelings instopt het! Poes Marja!

De auto zee gister: drukverlies herkend. En op ‘e tillefoon zat argens aanders inienend gien internet meer. Ik kon ok niet meer appen. Allienig thuus dus. Wat een gedoe toch. Ik bin vandemiddag naor mien k.k. (komputerkammeraod) Jarmo west.  Die is weeromme van vekaansie en hadde alles binnen de kotste keren oplost. De tillefoon het overal weer internet en ik kan overal weer appen. En de autobanen bin weer op odder brocht. D’r mekeerde praktisch niks an.

Hieronder nog twie foto’s die ‘k op 21 juli maekt hebbe in Eernewoolde doe daor et skutsjesilen was. Ik hebbe een veurkeur veur boten mit brune zeilen. Die vien ik arg mooi. Morgen in dit dagboek een stokkien over een boot mit zwatte zeilen.