Kattegeraos

A’k votgao zeg ik altied tegen poes Marja dat hi’j goed op et huus passen moet. Ik wete now dat hi’j dat geweldig goed kan. Gisteraovend ha’k  deuren en raemen tegen mekeer losstaon om de waarmte uut et huus te kriegen. Poes lag in mien warkkaemer, ik zat in de kaemer. En doe heurde ‘k inienend een verschrikkelik kattegeraos. Ien van de buurtpoezen was de deure inkommen en in de hal naor et voerbakkien van poes Marja lopen. Die kreeg dat in de gaten et het de indringer doe et huus uutjacht. Ik wete nog niet wie d’r zo hadde raosd het. Misschien beidend wel. Mar ik hebbe mien eigen poes daornao allemachtig prezen! Ik kan gerust votgaon, poes past geweldig goed op.

Ik hebbe Pieter in de naomiddag op vesite had. We hebben even genoeglik bi’jpraot. Dat wodde ok wel es weer tied. Ik bewere de kraanten, Liwwadder Kraante en Stellingwarf, altied veur Pieter. En omdawwe mekeer al een schoft niet zien hadden, laggen d’r veur zeuven maonden kraanten veur him in de gerage. Die het hi’j allemaole mitneumen, dat die man het veurlopig wel wat te doen!

Hieronder nog een foto van gister. In Suawoolde ligt een jachthaven en een kamperplak an et Preenses Margrietkenaol. En daor veert dus een zunnepontien over et PM-kenaol van Suawoolde naor de overkaant en weeromme. An de overkaant leit een fietspad. De iene kaant op kuj’ naor Burgum en de aandere kaant op naor Eernewoolde. Wi’j bin ok al es mit oonze fietsen overzet deur dat zunnepontien.