Katte en hond

Ik bin vandemorgen op ‘e fiets naor de dokter in Wolvege west. Dat gong best. Ik hadde vleden weke deensdag henne moeten om de oren uutspuiten te laoten, mar doe belaande ik morgens slim betied in et ziekenhuus en hebben ze van daor uut beld da’k niet kommen kon. Mar vandaege kon dat dus wel. We gaon vandeweke trouwens niet uut fietsen en veren. Ik moet eerst mar wat anstarken en butendat is et gewoon te hiete en benauwd veur zokke aktiviteiten.

In et Stellingwarfs Woordeboek staon onder et lemma katte de zinnen: Die leven as katte en hond en Die vechten as katte en hond. Dan wo’n d’r vanzels meensken mit bedoeld. Mar mit echte katten en honnen wil zoks best nog wel es wat mitvalen. Fettje stuurde me onderstaonde foto toe. Dit bin de hond en de katte van heur zeune Johan en die zien vrouw Stefanie. De foto is maekt deur Stefanie. De hond hiet Josta en de katte Barry. Zo kan et dus ok. Hiel wat meensken kun hier een veurbeeld an nemen.