Kastmark Blesdieke

Vandemorgen he’k eerst naor fysiosport in Wolvege west en doe bin ‘k naor huus gaon en he’k theedronken mit Anke die de boel an ’t schonemaeken was. Ik hebbe drekt ok een peer plakkies bolle had en doe bin ‘k drekt weer votgaon. Om goed twaelf ure wa’k in et mooie karkien van Blesdieke. Daor ston ik vandemiddag mit een boekekraom op ‘e kastmark. Et was de hiele middag beheurlik drok en hiel genoeglik. Ik hebbe mit een protte meensken praot, mooi wat boeken verkocht en zels netuurlik ok wat kocht: een peer breiden sokken, een kruudkoeke mit gember en een stokkien belegen keze. Halverwege de middag was d’r een optreden van de ukelilleklub Blesdieke. Allemaole vrouwluden. Ze zongen kastlieties en aandere lieties van bi’jveurbeeld John Denver en BZN. En veerder he’k lekkere, hiete poeiermelk en kastkraansies had. Hieronder een foto: een volle karke tiedens et optreden van de ukelilleklub.