Kastkaorten

Ik hebbe now 113 kastkaorten schreven, dat is veurlopig genoeg. D’r zullen nog wel een peer bi’jkommen daor a’k niet an docht hebbe. Ik hebbe de hiele lieste die ‘k in de komputer zitten hebbe now bi’jlanges west. Pattie meensken stuur ik een mailtien, die bin dat zo wend. Ik hebbe de betreffende lieste now bi’j de kaorten legd die ‘k weerommekriege. En ja… as meensken een peer jaor niks van heur heuren laoten, gaon ze van de lieste of. Ik moet streng wezen. Mar… meensken die niet meer van die kaorten versturen kunnen omdat ze te oold binnen, kriegen vanzels ontheffing. Streng mar ok rechtveerdig!

Ik hebbe et boek Oldeholtpade in vroegere tijden van Anita Exterkate-Bos eins in iene goeze uutlezen. In twie daegen om percies te wezen. Et is een feest van herkenning. Et gaot meerstal over de jaoren van nao de oorlog. Daor hebbe ik weet van. En ok al woon ik een dörp veerderop, ik kenne en kende vanzels een protte meensken in Hooltpae. Dat et komt me allegeer slim bekend veur. Hiel mooi om te lezen en hiel goed dat zoks vaastelegd is. Ok veur de meensken die nao oons kommen.