Kast- en wintermarken

Vandemorgen he’k een bak mit boeken ophaeld in Berkoop bi’j de Stellingwarver Schrieversronte. De verkope van Stellingwarver boeken zit in de onderwal. D’r bin te min vri’jwilligers veur de sutelaktie en ik verkope ok lange niet meer zovule as vroeger omda’k vule minder vaeke votgao te vertellen. Butendat is boekhaandel Zwikstra in Wolvege d’r niet meer. As d’r niet genoeg boeken verkocht wodden en d’r vule minder centen binnenkommen, kun d’r gien of minder ni’je boeken uutgeven wodden. Zo simpel is et. We moe’n dus an de bak! Ik zal dit jaor nog naor in ieder geval vier winter- en kastmarken mit mien negosie. Ik hope da’k jim daor dan zie en da’k jim een boek verkopen kan. Of meer as ien boek vanzels! Hier de plakken waor a’k henne zal. Et begint de kommende zaoterdag al. Op zaoterdag 9 november bin ik op ‘e Wintermark in et dörpshuus van Rottum. Et is van 10 -16 ure. Op zaoterdag 30 november bin ik op ‘e Wintermark van Mildam. Ik stao dan in De Geele Bosch in Hooltwoolde. Dat zit tegen Mildam an. Et is van 10-17 ure. Op vri’jdag 6 december bin ik op ‘e Kastmark in et karkien van Blesdieke. Et is middags van 13-18 ure. En op zaoterdag 14 december bin ik op ‘e Kastmark in de karke van Scharpenzeel. Et is daor van 10-16 ure.

Vandemiddag he’k weer lekker op ‘e fiets naor Wolvege west om bosschoppen op te haelen. Mit beide fietstassen vol bin ‘k thuuskommen. Et centrum van Wolvege staot hielemaole op ‘e kop. Alles zal daor opknapt wodden. Ondaanks et feit dat de zunne d’r niet bi’j was he’k d’r een foto maekt.