Kast- en ni’jjaorskaorten

Dit is een verhipt vroeg dagboekstokkien veur mien doen, mar ik moet aanst de diek nog uut en wete niet hoe laete a’k vanaovend weer thuus bin. Ik zal onderwegens ok nog wat kast- en ni’jjaorskaorten in de busse doen. Dan he’k d’r tot now an toe 113 verstuurd. Aanders schreef ik al dat spul in iene dag, now he’k zo now en dan wat schreven. De eersten roegelen hier et huus ok al in. Ik hebbe et langere verhael Kaspar now veurlopig wel klaor. Ik hebbe d’r wiethoevaeke op ommefiekt. Et is een verhael van 2.164 woorden wodden. Ik bin van doel en schrief in disse wintertied nog twie van die lange verhaelen. Ik wete al wel waor et over gaon moet en ik wete de titels ok al. Rooie vossen of rooie wolven, wat et wodt dat wee’k nog niet, en Mombassa. As de oolde huud wat mitwarken wil, moet et allemaole goedkommen. En now doe ‘k et leer om de hakken en za’k et pad uut.