Karnemelkziepe

Martsje de Jong het jaorenlaank verhaeleaovens orgeniseerd. Dan wodden d’r schrievers vraogd die een verhael veurlezen mochten dat niet eerder publiseerd was. Ik wete nog da’k op een keer, et zal an et aende van 2021 west hebben, naor zoe’n aovend toe west bin. Dat was in de omkrieten van Butenpost in een grote ronde tente. Et staot me zo bi’j da’k daor mit Fettje henne west hebbe. Een schoffien laeter moch ik zels ok een keer an zoe’n aovend mitdoen. Dat was in Het Grauwe Paard in Marssum. Ik hebbe daor doe mien verhael Karnemelkziepe veurlezen. Dat is laeter terechtekommen in mien laeste verhaelebundel Naozoemerlaand. Een dag of wat leden kree’k bericht van Martsje dat ze al die verhaelen die de jaoren deur her en der veurlezen binnen graeg uutgeven willen in een boek. Hille Faber van uutgeveri’je De Ryp is wel genegen om dat boek uut te geven. Dat is mooi ni’js. Now komt dat verhael van me dus in nog een boek te staon!