Kapper

Mien verontschuldigings veur et stokkien van gister. Ik hadde et over een winterkeuninkien, mar dat mooie voegeltien hiet vanzels van doempien. Dat is echt Stellingwarfs en vule mooier.

Ik hebbe vannaacht vanzels ok droomd. Ik was an et sutelen in Berkoop. Et moet wel lange leden west hebben, want Vrouw Hof was d’r nog bi’j. Het die trouwens ooit wel suteld? In ieder geval verkocht ik een verhaelebundel van mi’jzels daor a’k et bestaon niet iens van wus. Bliekber hadde mien uutgever buten mi’j omme een verhaelebundel van me uutgeven. Mooie uutgever! Ik hebbe d’r vanzels nooit ok mar iene  cent van beurd. Ik hadde dit jaor aenlik nog zo graeg ien keer sutelen wild, omdat et van ’t jaor de 50^ste sutelaktie is. Mar ik kriege staorigan meer last van mien gewrichten: kni’jen, linkerhaand, rechterelleboge. Dat sutelen wodt dus nooit weer wat en dat spiet me slim.

Vandemiddag he’k op ‘e fiets naor kapster Bertha in Et Vene west. Et was de waarmste 21 juni ooit. Et veurjaor is waarm uut aende zet. Et was 21 graoden. Henne ha’k et veur de wiend, mar weeromme d’r pal tegenin. En d’r ston een best stok wiend. Dan komt et op ‘e krop van de blaoze an en wil de akku wel leeg. Ik hebbe eerst een koppien  thee bi’j Bertha had mit een plakkien koeke mit botter. Doe het ze een ure mit me an de gang west om me toonber te maeken. Dat is lokt, dat ik kan now zaoterdag en zundag netties de weg uut naor Liwwadden en Noordwoolde. Nao et toonber maeken he’k een kop tomate-/gruuntesoep had en een croque madame. En doe nog een koppien thee mit sukelaogies. Op ‘e hennereize he’k een foto maekt van et meultien an de Kuunder onder Mildam.