Kaorten

Vandaege bin ‘k begonnen mit et hadde-op veurlezen van mien toespraoke die ‘k vri’jdagmiddag holen zal in et gemientehuus in Wolvege naor anleiding van et onthullen van mien petret daore. A’k et elke dag een keer hadde-op rippetere, moet et vri’jdag goedkommen, zoj’ zo zeggen. Ik bin ok begonnen en leer et eerste pat van De kwakzalvers, een verhael van de Vlaamse schriever Louis Paul Boon, uut et heufd. Tiedens de Fries/Stellingwarver Aovend op 9 feberwaori bi’j boekhaandel Binnert Overdiep in Et Vene zal ik et begin van et verhael in et Stellingwarfs vertellen en Douwe Kootstra et laeste pat in et Fries. Dat hebben we ooit eerder een keer daon, mar dat is jaoren leden. Ik moet dit dus opni’j leren. Ik hebbe tot now an toe 110 kast- en ni’jjaorskaorten schreven. Een kleine honderd he’k in de brievebusse daon, de rest breng ik hier in et dörp rond. D’r kommen lichtkaans nog wel een peer bi’j, mar 110 liekt me al een hiele flut toe.